تاریخ اشاعت: August 5, 2026 - 12:04 PM
Growing Saudi Israel Divide Clouds Future of India Led IMEC Corridor
سعودی عرب اور اسرائیل میں بڑھتا فاصلہ، بھارتی مڈل ایسٹ اکنامک کوریڈور منصوبہ کھٹائی میں پڑ گیا
▫️سعودیہ مصر اور شام کے راستے نئے علاقائی رابطوں کی تلاش میں، اسرائیل پر انحصار کے باعث بھارت سے یورپ تک مجوزہ راہداری کی پیش رفت رک گئی: فنانشل ٹائمز
سعودی عرب اور اسرائیل کے درمیان بڑھتے سیاسی فاصلے نے بھارت کے اہم علاقائی منصوبے انڈیا مڈل ایسٹ یورپ اکنامک کوریڈور (آئی ایم ای سی) کے مستقبل کو غیر یقینی بنا دیا ہے۔
یہ راہداری بھارت کو متحدہ عرب امارات، سعودی عرب اور اسرائیل کے راستے یورپ سے جوڑنے کے لیے تجویز کی گئی تھی۔ منصوبے کو چین کے بیلٹ اینڈ روڈ انیشیٹو کے مقابل ایک نئے تجارتی راستے کے طور پر پیش کیا گیا تھا۔
برطانوی اخبار فنانشل ٹائمز کے مطابق آئی ایم ای سی کا مقصد صرف تجارت بڑھانا نہیں تھا بلکہ اسے آبنائے ہرمز اور باب المندب جیسے حساس بحری راستوں پر انحصار کم کرنے کے ایک ذریعے کے طور پر بھی دیکھا جا رہا تھا۔
تاہم مشرق وسطیٰ میں جاری کشیدگی، اسرائیل سے تعلقات بہتر بنانے میں سعودی عرب کی کم ہوتی دلچسپی اور خلیجی ممالک کے درمیان اختلافات نے منصوبے کی پیش رفت سست کر دی ہے۔
اس راہداری کے لیے سعودی عرب اور اسرائیل دونوں کی شمولیت اہم سمجھی جاتی ہے۔ اگر ریاض اسرائیل سے الگ رہتے ہوئے علاقائی رابطوں کو فروغ دینے کی پالیسی جاری رکھتا ہے تو آئی ایم ای سی اپنی موجودہ شکل میں مکمل ہونا مشکل ہو سکتا ہے۔
بھارت کے لیے بھی اسرائیل کو اس منصوبے سے الگ کرنا آسان نہیں ہوگا۔ نئی دہلی کے اسرائیل کے ساتھ مضبوط دفاعی اور سٹریٹجک تعلقات ہیں، جبکہ آئی ایم ای سی کو بھارت کی چین کے بڑھتے معاشی اثرورسوخ کا مقابلہ کرنے کی حکمت عملی کا حصہ بھی سمجھا جاتا ہے۔
سعودی عرب اس دوران ایسے متبادل منصوبوں پر کام کر رہا ہے جن میں اسرائیل کی ضرورت نہ رہے۔ ان میں سعودی عرب کے بحیرہ احمر کے ساحل کو مصر کے جزیرہ نما سینا سے جوڑنے والا تقریباً 32 کلومیٹر طویل مجوزہ پل شامل ہے، جسے بعض حلقوں میں "موسیٰ برج" کہا جاتا ہے۔
اس مجوزہ راستے سے سعودی عرب کو مصر کے ذریعے بحیرہ روم اور یورپی منڈیوں تک رسائی کے نئے امکانات مل سکتے ہیں۔ تجزیہ کار اسے آئی ایم ای سی کے ممکنہ متبادل راستوں میں سے ایک قرار دے رہے ہیں۔
ریاض ایک فائبر آپٹک کیبل منصوبے پر بھی کام کر رہا ہے، جس کے ذریعے سعودی عرب کو شام اور بحیرہ روم کے راستے یونان سے جوڑنے کی تجویز ہے۔ اس راستے میں اسرائیل کو مکمل طور پر نظرانداز کیا جا سکتا ہے۔
فنانشل ٹائمز کے مطابق یورپی ممالک اب بھی آئی ایم ای سی میں دلچسپی رکھتے ہیں، لیکن خطے میں امن، استحکام اور قابل اعتماد سیاسی ماحول کے بغیر پورے منصوبے پر عمل درآمد آسان نہیں ہوگا۔
اگر امریکا سعودی عرب اور اسرائیل کو اس منصوبے پر دوبارہ قریب نہ لا سکا تو آئی ایم ای سی ایک بڑی مشترکہ اقتصادی راہداری کے بجائے محدود دوطرفہ تجارتی، ڈیجیٹل اور توانائی منصوبوں میں تبدیل ہو سکتا ہے۔