نیو یارک | ری نیوز انٹرنیشنل ڈیسک نیوز
برطانیہ سے تعلق رکھنے والے 21 سالہ نوجوان ڈینیئل جیکسن، جنہوں نے یورپ میں اپنی خود ساختہ ریاست قائم کرنے کا اعلان کر رکھا ہے، کو انسانی ہمدردی کی سرگرمیوں کے اعتراف میں نیویارک میں اقوام متحدہ کے ہیڈکوارٹرز میں منعقدہ تقریب کے دوران ایوارڈ سے نوازا گیا ہے۔
امریکی اخبار نیویارک پوسٹ کے مطابق ڈینیئل جیکسن کو یہ اعزاز ان کی خود ساختہ ریاست آزاد جمہوریہ وردیس (Free Republic of Verdis) کی جانب سے افریقی ملک آئیوری کوسٹ میں امدادی سرگرمیوں پر دیا گیا۔
9 اکتوبر 2026 کو منعقدہ تقریب میں یہ ایوارڈ انسٹی ٹیوٹ آف پبلک پالیسی اینڈ ڈپلومیسی ریسرچ نے پیش کیا۔ تقریب اقوام متحدہ کے ہیڈکوارٹرز میں منعقد ہوئی، تاہم یہ اقوام متحدہ کا سرکاری ایوارڈ نہیں تھا۔
ڈینیئل جیکسن نے محض 14 سال کی عمر میں اپنے چند دوستوں کے ساتھ مل کر ایک الگ ریاست قائم کرنے کا تصور پیش کیا تھا۔ بعد ازاں 30 مئی 2019 کو انہوں نے دریائے ڈینیوب کے کنارے کروشیا اور سربیا کے درمیان واقع ایک علاقے پر آزاد جمہوریہ وردیس کے قیام کا اعلان کردیا۔
تقریباً 125 ایکڑ رقبے پر مشتمل اس علاقے کو نقشوں میں پاکٹ تھری کے نام سے جانا جاتا ہے۔ یہ علاقہ کروشیا اور سربیا کے درمیان سرحدی تنازعے سے منسلک ہے اور جیکسن کا مؤقف ہے کہ دونوں ممالک اس مخصوص قطعۂ اراضی پر ملکیت کا دعویٰ نہیں کرتے۔
رپورٹ کے مطابق خود ساختہ ریاست وردیس کی انتظامیہ تقریباً 400 رجسٹرڈ شہریوں کا دعویٰ کرتی ہے، جبکہ اس کا الگ پرچم، پاسپورٹ، قوانین، آئین اور کابینہ بھی تشکیل دی جاچکی ہے۔
تاہم وردیس کو اقوام متحدہ یا عالمی برادری کی جانب سے ایک آزاد اور خودمختار ملک کے طور پر تسلیم نہیں کیا گیا۔
ڈینیئل جیکسن اور ان کے ساتھیوں کی جانب سے علاقے میں مستقل آبادکاری کی کوششیں بھی کامیاب نہیں ہوسکیں۔ کروشین حکام کی جانب سے علاقے تک رسائی پر پابندیوں کے باعث جیکسن اپنی خود ساختہ حکومت جلاوطنی میں چلا رہے ہیں۔
ان مشکلات کے باوجود وردیس کی انتظامیہ نے بین الاقوامی سطح پر رابطے بڑھانے اور انسانی ہمدردی کی سرگرمیوں کے ذریعے اپنی شناخت قائم کرنے کی کوششیں جاری رکھی ہوئی ہیں۔
آئیوری کوسٹ میں امدادی سرگرمیوں کے اعتراف میں ایوارڈ حاصل کرنے کے علاوہ وردیس کے وزیر برائے انسانی امور جیفری لی نے 9 اکتوبر کو اقوام متحدہ کی جنرل اسمبلی سے متعلق نوجوانوں کے ایک فورم میں بھی شرکت کی، جہاں انہوں نے نوجوانوں کی شمولیت، انسانی امداد اور مستقبل کے منصوبوں پر اظہار خیال کیا۔
ڈینیئل جیکسن نے اس موقع پر کہا کہ کم عمری میں عالمی سطح کی تقریبات میں شرکت ان کے لیے ایک غیر معمولی تجربہ ہے اور وہ اب بھی ایسی شخصیات اور اہم بین الاقوامی اجتماعات کا حصہ بننے کے تجربے سے مانوس ہو رہے ہیں۔
وردیس کی انتظامیہ کے مطابق اسے دنیا بھر سے شہریت کے حصول کے لیے درخواستیں اور دلچسپی کے پیغامات موصول ہو رہے ہیں، تاہم علاقائی تنازعے، سفارتی شناخت کے فقدان اور آبادکاری میں رکاوٹوں کے باعث اس خود ساختہ ریاست کا مستقبل بدستور غیر یقینی ہے۔