تاریخ اشاعت: August 3, 2026 - 4:08 PM
Taxila’s Historic Heritage Must Be Conserved, Not Recreated : Warns UNESCO
ٹیکسلا کا تاریخی ورثہ محفوظ کیا جائے، دوبارہ تخلیق نہیں : یونیسکو کا انتباہ
▫️محمد فیصل سلہریا
یہ تنازع محض ایک سرکاری محکمے اور بین الاقوامی ادارے کے درمیان اختلاف نہیں۔ اس کا تعلق پاکستان کے تاریخی مقامات کے انتظام، شہری منصوبہ بندی، زمین کے استعمال اور ثقافتی اثاثوں کے ساتھ ہمارے مجموعی رویے سے ہے۔
ٹیکسلا کو 1980 میں عالمی ثقافتی ورثے کی فہرست میں شامل کیا گیا تھا۔ یہ کسی ایک عمارت یا کھنڈر کا نام نہیں بلکہ 18 الگ آثارِ قدیمہ کے مقامات پر مشتمل ایک وسیع سلسلہ ہے۔ سرکپ اس خطے میں شہری آبادی کے ارتقا، جبکہ موہرا مرادو بدھ خانقاہی تہذیب کی غیر معمولی تاریخی شہادت پیش کرتا ہے۔ یونیسکو خود ٹیکسلا کو ایشیا کے اہم ترین آثارِ قدیمہ کے مقامات میں شمار کرتا ہے۔
حالیہ تنازع ان اطلاعات کے بعد سامنے آیا کہ بعض مقامات پر قدیم پتھروں سے بنی دیواروں کی جگہ نئی چنائی کی گئی یا محفوظ رہ جانے والی دیواروں کی اونچائی بڑھائی گئی۔ ذرائع کے حوالے سے شائع ہونے والی اطلاعات کے مطابق یونیسکو نے ایسی تبدیلیوں کو اصل تاریخی ساخت اور سالمیت کے لیے خطرہ قرار دیتے ہوئے حکومت سے انہیں واپس لینے اور مکمل دستاویزی ریکارڈ فراہم کرنے کا مطالبہ کیا ہے۔ یہ بھی خبردار کیا گیا ہے کہ مناسب اصلاحی اقدامات نہ ہونے پر ٹیکسلا کو خطرے سے دوچار عالمی ورثے کی فہرست میں شامل کیا جاسکتا ہے۔
دوسری جانب محکمہ آثارِ قدیمہ پنجاب اس کام کو دوبارہ تعمیر قرار دینے سے اتفاق نہیں کرتا۔ محکمے کا مؤقف ہے کہ کی گئی نئی تبدیلیوں کا مقصد کمزور اور موسمی اثرات سے متاثر ہونے والے سٹرکچرز کو سہارا دینا، مزید شکست و ریخت روکنا اور اصل آثار کو محفوظ رکھنا ہے۔ محکمے کے مطابق قومی اور بین الاقوامی ماہرین کے حالیہ دورے کے دوران تحفظاتی کام کی فنی بنیاد بھی واضح کی گئی۔ اس وضاحت کو سنے اور پرکھے بغیر یک طرفہ نتیجہ اخذ کرنا مناسب نہیں ہوگا۔
تاہم آثارِ قدیمہ کے تحفظ میں نیک نیتی کافی نہیں ہوتی۔ استعمال ہونے والے مواد، تعمیراتی طریقے اور ہر مداخلت کی ضرورت کو سائنسی اور دستاویزی شواہد سے ثابت کرنا پڑتا ہے۔
یونیسکو کے رہنما اصول واضح کرتے ہیں کہ آثارِ قدیمہ یا تاریخی عمارات کی دوبارہ تعمیر صرف غیر معمولی حالات میں قابلِ قبول ہوسکتی ہے۔ ایسی تعمیر مکمل اور تفصیلی دستاویزات پر مبنی ہونی چاہیے اور اس میں اندازوں یا قیاس آرائی کی کوئی گنجائش نہیں ہونی چاہیے۔ تاریخی ورثے کی صداقت کا تعلق صرف اس کی ظاہری صورت سے نہیں بلکہ اس کے اصل مواد، ساخت، تعمیراتی تکنیک، محل وقوع اور تاریخی ماحول سے بھی ہوتا ہے۔
اسی لیے کھنڈرات کو زیادہ مکمل، اونچا یا بصری طور پر خوب صورت دکھانا تحفظ کا درست معیار نہیں۔ کسی قدیم دیوار کا نامکمل ہونا بھی اس کی تاریخ کا حصہ ہوسکتا ہے۔ نئی چنائی سے اسے مکمل کرنا بظاہر جگہ کو بہتر بنا سکتا ہے، لیکن اگر اس سے اصل اور نئے مواد کے درمیان فرق، قدیم تعمیر کی حدود یا تاریخی شہادت دھندلا جائے تو یہ خوب صورتی تحفظ کی قیمت پر حاصل ہوتی ہے۔
یہ حقیقت بھی نظر انداز نہیں کی جاسکتی کہ کھلی فضا میں موجود ٹیکسلا کے آثار موسمی شدت، نباتات، زلزلوں، شہری پھیلاؤ، صنعتی سرگرمیوں، کان کنی اور غیر قانونی کھدائی جیسے خطرات کا سامنا کرتے ہیں۔ اس لیے کچھ مقامات پر فنی مداخلت ناگزیر ہوسکتی ہے۔ اصل سوال مداخلت کی موجودگی نہیں، بلکہ اس کی نوعیت، مقدار، مواد، دستاویزات اور قابلِ واپسی ہونے کا ہے۔
حکومت اور متعلقہ محکموں کے لیے بہترین راستہ مکمل شفافیت ہے۔ تحفظاتی منصوبے، ورثے پر اثرات کے جائزے، تعمیر سے پہلے اور بعد کی تصاویر، مجوزہ نقشے، استعمال شدہ مواد کی تجربہ گاہی رپورٹیں، نئے اور قدیم مواد کی مطابقت کی سٹڈیز اور آثارِ قدیمہ سے متعلق تحقیقی ریکارڈ عوام اور آزاد ماہرین کے سامنے پیش کیے جانے چاہئیں۔ اطلاعات کے مطابق یونیسکو نے بھی یہی دستاویزات طلب کی ہیں۔
اس جائزے کے لیے آثارِ قدیمہ، فنِ تعمیر، تعمیراتی انجینئرنگ، ارضیات، کیمیا، شہری منصوبہ بندی اور ورثہ کے قوانین کے ماہرین پر مشتمل آزاد کمیٹی قائم ہونی چاہیے۔ کمیٹی کو یہ طے کرنا چاہیے کہ کون سا کام ضروری تحفظ تھا، کہاں ضرورت سے زیادہ مداخلت ہوئی اور کون سے اضافے اصل ڈھانچے کو نقصان پہنچائے بغیر واپس لیے جاسکتے ہیں۔
ٹیکسلا میں یہ پہلا تنازع نہیں۔ 1998 میں بھیر ٹیلے کے اندر کھیل کا میدان تعمیر کرنے کی کوشش نے بھی عالمی ورثے کی سالمیت کو خطرے میں ڈال دیا تھا۔ یونیسکو کے بعد کے جائزے نے اس فیصلے کو ایک سنگین غلطی قرار دیتے ہوئے پورے ٹیکسلا کے لیے اثرات کے جائزے، واضح حفاظتی حدود اور جامع انتظامی منصوبے کی ضرورت پر زور دیا تھا۔
تقریباً تین دہائیاں گزرنے کے باوجود اگر اسی نوعیت کے سوالات دوبارہ پیدا ہورہے ہیں تو مسئلہ صرف کسی ایک منصوبے یا افسر کا نہیں بلکہ ادارہ جاتی نظام کا ہے۔ عالمی اہمیت کے آثار پر کام شروع ہونے سے پہلے لازمی آزاد جائزہ، یونیسکو سے بروقت مشاورت، عوامی دستاویزات اور واضح منظوری کا طریقۂ کار ہونا چاہیے۔
ٹیکسلا کی قدر اس بات میں نہیں کہ اس کے کھنڈرات نئے، مکمل یا زیادہ دل کش دکھائی دیں۔ اس کی اصل اہمیت ان پتھروں، بنیادوں، راستوں اور دیواروں میں ہے جو مختلف تہذیبوں کے حقیقی شواہد کے طور پر باقی ہیں۔
حکومت کو اس معاملے کو قومی وقار کا مسئلہ بنا کر دفاعی رویہ اختیار کرنے کے بجائے قومی ذمہ داری کے طور پر دیکھنا چاہیے۔ جہاں ناقابلِ تلافی تاریخی ورثہ داؤ پر لگا ہو، وہاں شفافیت، سائنسی تحفظ، کم سے کم مداخلت اور عالمی معیاروں کی پابندی کو سیاحت، خوب صورتی یا فوری ترقیاتی اہداف پر فوقیت حاصل ہونی چاہیے۔